作詞：小丙
編曲：方樹樑
監製：區瑞強
拿拿臨拿拿臨拿臨咪仆襯
人人人人人買飛都幾廿「勻」
財神爺財神爺財神快上身
中鑊甘先夠頂癮
是命運是命運事實未必用心買乜都梗會有運
是幸運是幸運是但亂點亂揀亂篤都中鑊「啃」
未係笨未係笨實在未必贏梗實則小賭可怡神
實在笨實在笨若為大賭度水度銀真老襯
有乜嘢 早過倒塔 係睇晨操睇試閘
點分靚嘢同埋垃圾 各施各法各牙刷
好似驗屍咁驗法 最怕佢晨早口「抹抹」
睇肚「Dump」又睇色澤 毛色靚肯定唔會「鴨」
短途胸肌要發達 長途最緊要睇腳法
千四唔跑跑千八 呢勻肯定大古惑
唔好睇少排位配搭 牌仔未必唔合拍
周末一於入場博殺 贏番幾口有排「吔」
有排「吔」
加碼 加碼 加碼 加碼
心思思 點落注 以小博大最啱Key
一膽四腳買孖T 孖Q穩陣一拖二
自制過關好Easy 串嚟串去鬥Quali
6串63過關位置 發鬼咗達都冇人知
亂局最好買少啲 博佢爆冷博Chance
又可以 買騎師 大師肯定好鬥志
仲有刀仔鋸大樹 六環彩最少買一注
隨時講聲唔好意思 中番個特獎有Face
拿拿臨拿拿臨拿臨咪仆襯
人人人人人買飛都幾廿「勻」
財神爺財神爺財神快上身
中鑊甘先夠頂癮
是命運是命運事實未必用心買乜都梗會有運
是幸運是幸運是但亂點亂揀亂篤都中鑊「啃」
未係笨未係笨實在未必贏梗實則小賭可怡神
實在笨實在笨若為大賭度水度銀真老襯
去馬 去馬 去馬 去馬
一出閘「佯」兩「佯」 出唔到閘真衰樣
唔知故意定係唔想 好彩長途都冇咁傷
前段包尾好緊張 中段上前似番啲樣
沿途㩒住唔好搶 留到直路至鬥斤兩
轉入直路坐包廂 前面受阻好勉強
抽出外欄再度上 左手推騎右手揚
鞭鞭有力啪啪響 最後幾步上上上
且！…… 叮噹馬頭要影相
廁所都唔去等中獎
贏馬 贏馬 贏馬 贏馬
買Win佢跑Place 買Place佢跑第四
Q T配腳包大「尾」 真係想我提早收皮
攪到臨尾仲走去補飛 嘥哂心機又腳都痺
大熱倒灶唔出奇 爆冷肯定分到飛起
A…… 睇吓電算機
Objection亮起唔好Meet飛 一於告到佢甩臂
仲告得佢甩真係歡喜 收番個特獎真係肥
輸咗嘅唔駛谷鬼氣 叫馬會做好心理準備
下次要「略」到佢趴地
拿拿臨拿拿臨拿臨咪仆襯
人人人人人買飛都幾廿「勻」
財神爺財神爺財神快上身
中鑊甘先夠頂癮
是命運是命運事實未必用心買乜都梗會有運
是幸運是幸運是但亂點亂揀亂篤都中鑊「啃」
未係笨未係笨實在未必贏梗實則小賭可怡神
實在笨實在笨若為大賭度水度銀真老襯