作詞：武雄
作曲：王俊傑
編曲：王俊傑
阮朋友因阿公今年九十外 細漢的時陣講是大尾鱸鰻
彼個時代做兄弟不比這嘛 人伊是重情重義閣重因阿嬤
聽講日本時代生活蓋硬斗 頂懸有夠鴨霸下面擱出一陣走狗
古意的鄉親乎因欺負到到 嘛只有放惦心內偷偷仔譙
(么壽哦)這是什麼情形 哪會黑甲白攏分袂清
(腫頜哦)這是什麼情形 哪會生意人你這呢黑心
(哭腰啦)這是什麼情形 哪會抬頭我攏看無光明
(僥倖哦)若擱這呢酷刑 保庇恁半瞑去堵到廖添丁
一九四五年阿本離開台灣 因阿公放一掛炮仔講有四樓懸
想講擱來日子會卡好討賺 所以趕緊娶因阿嬤來入洞房
隔頂年阮朋友因爸就來出世 號名叫做添丁有兩層意義
望伊招小弟 望伊行俠仗義 因為換人統治日子並無卡舒適
(豪洨啦)這是什麼情形 每個月總賺嘛攏無夠用
(抗議啦)這是什麼情形 人的厝共拆掉你欲安怎還
(鴨霸啦)這是什麼情形 竟然麻杉脫乎別人穿
(無效啦)若擱這呢酷刑 總有一天大家攏變做廖添丁
廖添丁奉殺死彼年二十六歲 是兄弟加創空去做廖爬
這件代誌乎因阿爸感慨真多 社會黑暗利益永遠勝過黑白
阮朋友出世彼年時機足歹 因阿爸講海海人生人生海海
既然不是講情講義的時代 添丁爸的後生阮朋友叫做發財
發財駛著伊的發財仔車 南北二路四界去賺吃
偏偏這嘛 不但錢歹賺 油是貴甲鬼仔強欲抓
發財駛著伊的發財仔車 南北二路四界去賺吃
偏偏這嘛 不但錢歹賺 大細項物件嘛攏不敢吃
發財駛著伊的發財仔車 南北二路四界去賺吃
偏偏這嘛 不但錢歹賺 連厝嘛攏無所在通好企
發財駛著伊的發財仔車 南北二路四界去賺吃
偏偏這嘛 不但錢歹賺 納的稅擱乎人拿去黑白撒
(白賊啦)這是什麼問題 哪會逐項物件攏起彼多
(白目哦)這是什麼問題 哪會賺錢無夠囝仔讀冊
(嘿白痴)這是什麼問題 哪會有人歸工攏咧練瘋話
(落台啦)若擱惦彼靠北 莫怪四界攏是廖添丁的子弟
-------------------------------------------------
《添丁發財》Thiam-ting Huat-tsâi
王俊傑Ông Tsùn-kia̍t
阮朋友怹阿公今年九十外
gún pîng-iú in a-kong kin-nî káu-tsa̍p-guā
細漢的時陣講是大尾鱸鰻
sè-hàn ê sî-tsūn kóng sī tuā-bué lôo-muâ
彼个時代做兄弟毋比這馬
hit-ê sî-tāi tsò hiann-tī m̄-pí tsit-má
人伊是重情重義閣重怹阿媽
lâng i sī tāng tsîng tāng gī koh tāng in a-má
聽講日本時代生活蓋硬篤
thiann-kóng Ji̍t-pún Sî-tāi sing-ua̍h kài ngē-táu
頂懸有夠壓霸
tíng-kuân ū-kàu ah-pà
下面閣出一陣走狗
ē-bīn koh tshut tsi̍t-tīn tsáu-káu
古意的鄉親予怹欺負到夠
kóo-ì ê hiong-tshin hōo in khi-hū kàu-kàu
嘛只有囥踮心內偷偷仔撟
mā tsí-ū khǹg tiàm sim-lāi thau-thau-á kiāu
夭壽喔
iáu-siū--ooh
這是啥物情形
tse sī siánn-mih tsîng-hîng
哪會烏佮白攏分袂清
ná ē oo kah pe̍h lóng hun buē tshing
腫頷喔
tsíng-ām--ooh
這是啥物情形
tse sī siánn-mih tsîng-hîng
哪會生理人你遮爾烏心
ná ē sing-lí-lâng lí tsiah-nī oo-sim
哭枵啦
khàu-iau--lah
這是啥物情形
tse sī siánn-mih tsîng-hîng
哪會攑頭我攏看無光明
ná ē gia̍h-thâu guá lóng khuànn-bô kong-bîng
僥倖喔
hiau-hīng--ooh
若閣遮爾酷刑
nā koh tsiah-nī khok-hîng
保庇恁半暝去拄著廖添丁
pó-pì lín puànn-mî khì tú-tio̍h Liāu Thiam-ting
一九四五年阿本仔離開臺灣
it-kiú sù-ngóo nî a-pún-á lī-khui Tâi-uân
怹阿公放一捾炮仔講有四樓懸
in a-kong pàng tsi̍t-kuānn phàu-á kóng ū sì-lâu kuân
想講閣來日子會較好討趁
siūnn-kóng koh-lâi ji̍t-tsí ē khah hó thó-thàn
所以趕緊娶怹阿媽來入洞房
sóo-í kuánn-kín tshuā in a-má lâi ji̍p tōng-pông
隔轉年阮朋友怹爸仔就來出世
keh-tńg-nî gún pîng-iú in pā-á tiō lâi tshut-sì
號名叫做添丁有兩層意義
hō-miâ kiò-tsuè Thiam-ting ū nn̄g-tsân ì-gī
望伊招小弟
bāng i tsio sió-tī
望伊行俠仗義
bāng i hîng-kiap tiōng-gī
因為換人統治
in-uī uānn lâng thóng-tī
日子並無較四序
ji̍t-tsí pīng bô khah sù-sī
嘐潲啦
hau-siâu--lah
這是啥物情形
tse sī siánn-mih tsîng-hîng
每個月總趁嘛攏無夠用
muí kò gue̍h tsóng thàn mā lóng bô-kàu īng
抗議啦
khòng-gī--lah
這是啥物情形
tse sī siánn-mih tsîng-hîng
人的厝共拆掉你欲按怎還
lâng ê tshù kā thiah-tiāu lí beh án-tsuánn hîng
壓霸啦
ah-pà--lah
這是啥物情形
tse sī siánn-mih tsîng-hîng
竟然麻衫褪予別人穿
kìng-jiân muâ-sann thǹg hōo pa̍t-lâng tshīng
無效啦
bô-hāu--lah
若閣遮爾酷刑
nā koh tsiah-nī khok-hîng
總有一工逐家攏變做廖添丁
tsóng ū tsi̍t-kang ta̍k-ke lóng piàn-tsò Liāu Thiam-ting
廖添丁夆刣死彼年二十六歲
Liāu Thiam-ting hông thâi--sí hit nî jī-tsa̍p-la̍k huè
是兄弟共創空去做抓耙
sī hiann-tī kā tshòng-khang khì tsò jiàu-pê
這件代誌予怹爸仔感慨真濟
tsit kiānn tāi-tsì hōo in pā-á kám-khài tsin tsē
社會烏暗利益永遠勝過烏白
siā-huē oo-àm lī-ik íng-uán sìng-kuè oo-pe̍h
阮朋友出世彼年時機足䆀
gún pîng-iú tshut-sì hit nî sî-ki tsiok bái
怹阿爸講海海人生人生海海
in a-pah kóng hái-hái jîn-sing jîn-sing hái-hái
既然毋是講情講義的時代
kì-jiân m̄-sī kóng-tsîng kóng-gī ê sî-tāi
添丁爸仔的後生阮朋友叫做發財
Thiam-ting pā-á ê hāu-senn gún pîng-iú kiò-tsuè Huat-tsâi
發財駛著伊的發財仔車
Huat-tsâi sái tio̍h i ê huat-tsâi-á tshia
南北二路四界去趁食
lâm-pak jī-lōo sì-kè khì thàn-tsia̍h
偏偏這馬毋但錢歹趁
phian-phian tsit-má m̄-nā tsînn pháinn thàn
油是貴甲鬼仔強欲掠
iû sī kuì kah kuí-á kiōng-beh lia̍h
發財駛著伊的發財仔車
Huat-tsâi sái tio̍h i ê huat-tsâi-á tshia
南北二路四界去趁食
lâm-pak jī-lōo sì-kè khì thàn-tsia̍h
偏偏這馬毋但錢歹趁
phian-phian tsit-má m̄-nā tsînn pháinn thàn
大細項物件攏嘛毋敢食
tuā-sè hāng mi̍h-kiānn lóng mā m̄-kánn tsia̍h
發財駛著伊的發財仔車
Huat-tsâi sái tio̍h i ê huat-tsâi-á tshia
南北二路四界去趁食
lâm-pak jī-lōo sì-kè khì thàn-tsia̍h
偏偏這馬毋但錢歹趁
phian-phian tsit-má m̄-nā tsînn pháinn thàn
連厝嘛攏無所在通好徛
liân tshù mā lóng bô sóo-tsāi thang-hó khiā
發財駛著伊的發財仔車
Huat-tsâi sái tio̍h i ê huat-tsâi-á tshia
南北二路四界去趁食
lâm-pak jī-lōo sì-kè khì thàn-tsia̍h
偏偏這馬毋但錢歹趁
phian-phian tsit-má m̄-nā tsînn pháinn thàn
納的稅閣予人提去烏白掖
la̍p ê suè koh hōo-lâng the̍h-khì oo-pe̍h iā
白賊啦
pe̍h-tsha̍t--lah
這是啥物問題
tse sī siánn-mih būn-tê
哪會逐項物件攏起遐濟
ná ē ta̍k hāng mi̍h-kiānn lóng khí hiah tsuē
白目喔
pe̍h-ba̍k--ooh
這是啥物問題
tse sī siánn-mih būn-tê
哪會趁錢無夠囡仔讀冊
ná ē thàn-tsînn bô-kàu gín-á tha̍k-tsheh
遐白痴
hiah pe̍h-tshi
這是啥物問題
tse sī siánn-mih būn-tê
哪會規工有人咧練痟話
ná ē kui kang ū-lâng teh liān-siáu-uē
落臺啦
lo̍h-tâi--lah
若閣踮遐哭爸
nā koh tiàm hia khàu-pē
莫怪四界攏是廖添丁的子弟
bo̍k-kuài sì-kè lóng-sī Liāu Thiam-ting ê tsú-tē