14512/《古怪少年家》Kóo-kuài Siàu-liân-ke
洪一峰Âng It-hong
有一个古怪少年家
ū tsi̍t-ê kóo-kuài siàu-liân-ke
看起來
khuànn--khí-lâi
歲頭無偌濟
hè-thâu bô guā-tsuē
紅領帶
âng niá-tuà
結甲真好勢
kat kah tsin hó-sè
是啥人好子弟
sī siánn-lâng hó tsú-tē
伊對姑娘真痴迷
i tuì koo-niû tsin tshi-bê
每日酒家一直踅
muí-ji̍t tsiú-ka it-ti̍t se̍h
有一个古怪少年家
ū tsi̍t-ê kóo-kuài siàu-liân-ke
想起來
siūnn--khí-lâi
實在真笑詼
si̍t-tsāi tsin tshiò-khe
踮街路看人
tiàm ke-lōo khuànn-lâng
像賞花
tshiūnn siúnn-hue
用目睭咧講話
iōng ba̍k-tsiu teh kóng-uē
人人講伊是一个
lâng-lâng kóng i sī tsi̍t-ê
歪喙想欲食龍蝦
uai-tshuì siūnn-beh tsia̍h liông-hê
有一个古怪少年家
ū tsi̍t-ê kóo-kuài siàu-liân-ke
看外型
khuànn guā-hîng
穿甲真整齊
tshīng kah tsin tsíng-tsuê
看態度有較欠人格
khuànn thāi-tōo ū khah khiàm jîn-keh
是啥人好子弟
sī siánn-lâng hó tsú-tē
伊對姑娘有痴迷
i tuì koo-niû ū tshi-bê
可惜無人欲奉陪
khó-sioh bô-lâng beh hōng-puê
有一个古怪少年家
ū tsi̍t-ê kóo-kuài siàu-liân-ke
講起來
kóng--khí-lâi
逐項伊都會
ta̍k hāng i to ē
𠢕吹牛畫天又畫地
gâu tshe-gû uē thinn iū uē tē
論正經無好勢
lūn tsìng-king bô hó-sè
人人講伊是一个
lâng-lâng kóng i sī tsi̍t-ê
歪喙想欲食龍蝦
uai-tshuì siūnn-beh tsia̍h liông-hê