作詞：佚名
作曲：古曲
(喂老婆 去邊度嚟呀)
(嗯 唔好講嘞 打咗八圈麻雀 食咗鋪雞糊咋)
(離晒譜㗎 成日顧住打牌 個老公放工返嚟呀
想話飲啖茶 個茶壺一滴茶都無呀)
(無茶你咪飲汽水囉 哎吔再唔係就拔蘭地嘞)
(喂你嫁咗人㗎咯喎)
(嫁咗同未嫁有咩分別啫)
(有天壤之別 你未嫁之前值萬八 嫁咗之後值毫八㗎咋)
(哎吔 咁你即係踩我咯噃)
(踩你又點呀 我打你都得呀)
(你夠膽吖嗱)
你想講惡我實唔怕 豈願無端遭責罵
你知否女人責任要管家 家中功夫懶做太過差
我口乾睇吓個茶壺 完全未有茶
哎三家缺一我實要打啦
喔 打咗八圈你仲要打
咁我未曾食過半舖滿糊 我實要打定啦
唉唔係我立亂將你話 家務拋開去打牌
你應該遭責罵囉
唔忿氣任你將我罵 我難作罷
要我受氣聽你話
嘻嘻 好話
豈能容讓 我唔順氣點下
你亂咁講說話 嗱我又再打多八圈㗎
你莫再沉迷落去 家務完全唔願掛
點算係沉迷落去 只係大眾娛樂吓 又唔係賭狗馬
(都唔啱啫)
你當係皇爺咁大曬 令我笑跌棚牙
我哋成伴侶共訂佳話 應要互助互愛相關心
才算是好對象 既是名份已訂下
創造個好家庭 你應份 以家庭為上 個人就當等下囉
我父母有家財 點會日日去捱罵 又點會夜夜去捱罵
你唔願顧家至有人話
本小姐鍾意 你無權任意查
(唔係話查你 問吓都唔得咩)
(問都唔得呀)
(呀老婆 算我唔啱唔着嘞 而家鬼咁肚餓
夾手夾腳入去煮飯食嘞)
(唔煮 出街食囉)
(嘩出街食 我打工㗎咋邊有咁多錢畀呀)
(而家邊個叫你畀錢啫 我外家大把錢呀)
(喂 你外家有錢你外家嘅事
男兒膝下有黃金呀 我唔用你外家嘅錢嘅)
恃住有啲家財 有啲聲架 就咪出嫁
你咪出聲 冇人會話你啞㗎
你語語咁相逼 我氣點下
我係財主女噃
(乞嚏)
我不聽寒酸話
喂你入得我門 便成我家下
你就要聽我話 不講金錢
金錢難道你唔重視 你做個小職員 我不過為愛甘心嫁咋
既係捱窮願意跟我 咁就唔該你去煲茶