演唱：愛愛
作曲：歌仔戲曲調~廈門調
正月算來春酒香 家家戶戶門聯紅
紅男綠女滿街巷 迎新正心輕鬆
只有雪梅心沉重 犧牲青春好花欉
為君立誓不嫁尪 甘願來守節一世人
二月算來陳神雷 山前山後草青翠
好命有尪伴相隨 賞風景心花開
講起雪梅上克虧 每日怨嘆流珠淚
一片純情全枉費 無緣份甲君來做堆
三月算來是清明 人人掃墓上山頂
雪梅抱子到墓前 墓桌上排三牲
見景又來想舊情 傷心目屎流沒停
郎君那通即僥倖 害著阮孤單過一生
四月算來春天後 無寒無熱風透透
雪梅心肝亂抄抄 想郎君情意厚
目屎已經不願流 一心望子會出頭
較苦也要來等候 甘願來拖磨到年老
五月算來扒龍船 河邊人馬亂紛紛
雪梅有子無郎君 對誰人來議論
當做註定的命運 迫阮空過好青春
一生伴子守家門 忍耐著滿腹的苦悶
六月算來是半年 農村收冬喜沖天
只有雪梅暗傷悲 又寂寞又空虛
坐在床前想彼時 暗中唱著斷腸詩
希望子兒會成器 表明著對君的情義
七月算來日頭燒 看見後庭樹落葉
雪梅堅心像鐵石 守清節無動搖
日日思君開聲叫 夜夜夢中看會著
名聲第一愛保惜 不願給閒人來恥笑
八月算來是中秋 人人賞月心清幽
雪梅目屎條目睭 怨舊恨嘆心愁
站在窗前對月娘 誠心誠意來懇求
千辛萬苦願接受 給子兒將來有成就
九月算來是重陽 拜祭亡夫情意重
一拜想起君面容 心又酸斷肝腸
這世甲君命相沖 恨天怨地啥路用
雪梅對君來參詳 望後世會通結成雙
十月算來秋風寒 為子補衫穿針線
窗外鴻雁雙做伴 引起人心空彈
鴛鴦已經來拆散 不願擱來嘆孤單
看子一年一年大 怎拖磨心也真快活
十一月算來是冬節 手來搓圓心怨嗟
自嘆孤單子又細 目屎又滴落地
對子句句講訓話 勸伊認真來讀冊
管伊透風落霜雪 有立志成功無問題
十二月算來過年關 柴空米盡心焦煩
遵守婦道心沒亂 冷寒餓也甘願
雪梅心內有打算 教子做人要正端
為非做歹萬人怨 做好事名聲萬世傳
670/《雪梅思君》Suat-muî Su Kun
江蕙Kang Huī
正月算來春酒芳
tsiann--gue̍h sǹg--lâi tshun-tsiú phang
家家戶戶門聯紅
ke-ke-hōo-hōo mn̂g-liân âng
紅男綠女滿街巷
hông-lâm li̍k-lú muá kue-hāng
迎新正心輕鬆
ngiâ sin-tsiann sim khin-sang
只有雪梅仔心沉重
tsí-ū Suat-muî--á sim tîm-tāng
犧牲青春好花欉
hi-sing tshing-tshun hó hue-tsâng
為君立誓毋嫁翁
uī kun li̍p-sè m̄ kè-ang
甘願來守節一世人
kam-guān lâi siú-tsiat tsi̍t-sì-lâng
二月算來霆新雷
jī--gue̍h sǹg--lâi tân sin-luî
山前山後草青翠
suann-tsîng suann-āu tsháu tshinn-tshuì
好命有翁伴相隨
hó-miā ū ang phuānn sio-suî
賞風景心花開
siúnn hong-kíng sim-hue khui
講起雪梅仔上克虧
kóng-khí Suat-muî--á siōng khik-khui
每日怨嘆流珠淚
muí-ji̍t uàn-thàn lâu tsu-luī
一片純情全枉費
tsi̍t-phiàn sûn-tsîng tsuân óng-huì
無緣份佮君來做堆
bô iân-hūn kah kun lâi tsuè-tui
三月算來是清明
sann--gue̍h sǹg--lâi sī tshing-bîng
人人掃墓上山頂
lâng-lâng sàu-bōng tsiūnn suann-tíng
雪梅仔抱囝到墓前
Suat-muî--á phō kiánn kàu bōng-tsîng
墓埔頂排三牲
bōng-poo-tíng pâi sam-sing
見景又來想舊情
kiàn kíng iū lâi siūnn kū-tsîng
傷心目屎流袂停
siong-sim ba̍k-sái lâu buē-thîng
郎君仔哪通遮僥倖
lông-kun--á ná thang tsiah hiau-hīng
害著阮孤單過一生
hāi tio̍h gún koo-tuann kuè it-sing
四月算來春天後
sì--gue̍h sǹg--lâi tshun-thinn āu
無寒無熱風透透
bô kuânn bô jua̍h hong thàu-thàu
雪梅仔心肝亂操操
Suat-muî--á sim-kuann luān-tshau-tshau
想郎君情意厚
siūnn lông-kun tsîng-ì kāu
目屎已經毋願流
ba̍k-sái í-king m̄-guān lâu
一心望囝會出頭
tsi̍t-sim bāng kiánn ē tshut-thâu
較苦也欲來等候
khah khóo iā beh lâi tán-hāu
甘願來拖磨到年老
kam-guān lâi thua-buâ kàu nî-lāu
五月算來扒龍船
gōo--gue̍h sǹg--lâi pê-lîng-tsûn
河邊人馬亂紛紛
hô-pinn jîn-má luān-hun-hun
雪梅仔有囝無郎君
Suat-muî--á ū kiánn bô lông-kun
對啥人來議論
tuì siánn-lâng lâi gī-lūn
當做註定的命運
tòng-tsuè tsù-tiānn ê miā-ūn
迫阮空過好青春
pik gún khang kuè hó tshing-tshun
一生伴囝守家門
it-sing phuānn kiánn siú ka-mn̂g
忍耐著滿腹的苦悶
jím-nāi tio̍h muá-pak ê khóo-būn
六月算來是半年
la̍k--gue̍h sǹg--lâi sī puànn-nî
農村收冬喜沖天
lông-tshuan siu-tang hí tshiong-thinn
只有雪梅仔暗傷悲
tsí-ū Suat-muî--á àm siong-pi
又寂寞又空虛
iū tsi̍k-bo̍k iū khang-hi
坐在床前想彼時
tsē tsāi tshn̂g-tsîng siūnn hit-sî
暗中唱著斷腸詩
àm-tiong tshiùnn tio̍h tuān-tn̂g-si
希望囝兒會成器
hi-bāng kiánn-jî ē sîng-khì
表明著對君的情義
piáu-bîng tio̍h tuì kun ê tsîng-gī
七月算來日頭燒
tshit--gue̍h sǹg--lâi ji̍t-thâu sio
看見後埕樹落葉
khuànn-kìnn āu-tiânn tshiū lo̍h hio̍h
雪梅仔堅心像鐵石
Suat-muî--á kian-sim tshiūnn thih-tsio̍h
守清節無動搖
siú tshing-tsiat bô tāng-iô
日日思君開聲叫
ji̍t-ji̍t su kun khui-siann kiò
夜夜夢中看會著
iā-iā bāng-tiong khuànn ē-tio̍h
名聲第一愛寶惜
miâ-siann tē-it ài pó-sioh
毋願予閒人來恥笑
m̄-guān hōo îng-lâng lâi thí-tshiò
八月算來是中秋
peh--gue̍h sǹg--lâi sī tiong-tshiu
人人賞月心清幽
lâng-lâng siúnn-gue̍h sim tshing-iu
雪梅仔目屎牢目睭
Suat-muî--á ba̍k-sái tiâu ba̍k-tsiu
怨舊恨嘆新愁
uàn kū-hūn thàn sin-tshiû
踮在窗前對月娘
tiàm-tsāi thang-tsîng tuì ge̍h-niû
誠心誠意來懇求
sîng-sim sîng-ì lâi khún-kiû
千辛萬苦願接受
tshian-sin-bān-khóo guān tsiap-siū
予囝兒將來有成就
hōo kiánn-jî tsiong-lâi ū sîng-tsiū
九月算來是重陽
káu--gue̍h sǹg--lâi sī tiông-iông
拜祭亡夫情義重
pài-tsè bông-hu tsîng-gī tiōng
一拜想起君面容
tsi̍t-pài siūnn-khí kun bīn-iông
心又酸斷肝腸
sim iū sng tuān kan-tiông
這世佮君命相沖
tsit sè kah kun miā sio-tshiong
恨天怨地啥路用
hūn-thinn uàn-tē siánn lōo-iōng
雪梅仔對君來參詳
Suat-muî--á tuì kun lâi tsham-siông
望後世會通結成雙
bāng āu-sè ē thang kiat sîng-song
十月算來秋風寒
tsa̍p--gue̍h sǹg--lâi tshiu-hong kuânn
為囝補衫穿針線
uī kiánn póo-sann tshng tsiam-suànn
窗外鴻雁雙做伴
thang-guā hông-gān siang tsuè-phuānn
引起人心空彈
ín-khí lâng sim khang tuânn
鴛鴦已經來拆散
uan-iunn í-king lâi thiah-suànn
毋願閣來嘆孤單
m̄-guān koh lâi thàn koo-tuann
看囝一年一年大
khuànn kiánn tsi̍t-nî tsi̍t-nî tuā
怎拖磨心也真快活
tsuánn thua-buâ sim iā tsin khuìnn-ua̍h
十一月算來是冬節
tsa̍p-it--gue̍h sǹg--lâi sī tang-tseh
手來挲圓心怨慼
tshiú lâi so-înn sim uàn-tsheh
自嘆孤單囝又細
tsū thàn koo-tuann kiánn iū sè
目屎又滴落地
ba̍k-sái iū tih lo̍h-tē
對囝句句講訓話
tuì kiánn kù-kù kóng hùn-uē
勸伊認真來讀冊
khǹg i jīn-tsin lâi tha̍k-tsheh
管伊透風落霜雪
kuán i thàu-hong lo̍h sng-seh
有立志成功無問題
ū li̍p-tsì sîng-kong bô būn-tê
十二月算來過年關
tsa̍p-jī--gue̍h sǹg--lâi kuè-nî-kuan
柴空米盡心操煩
tshâ khang bí tsīn sim tshiau-huân
遵守婦道心袂亂
tsun-siú hū-tō sim buē luān
忍寒枵也甘願
jím kuânn-iau iā kam-guān
雪梅仔心內有打算
Suat-muî--á sim-lāi ū tá-suàn
教囝做人愛正端
kà-kiánn tsuè-lâng ài tsiànn-tuan
為非做歹萬人怨
uī-hui tsuè-pháinn bān-lâng uàn
做好事名聲萬世傳
tsuè hó-sū miâ-siann bān-sè thuân