作詞：林夕
作曲：陳輝陽
編曲：陳輝陽@好好笑
再見！唔好怪我第一句就同你講再見，
因為我真係專程嚟同你道別嘅......
你唔講嘢，淨係聽我講嘢，
果陣時個世界好安靜，無而家咁嘈，
襯得我特別吱喳，特別開心
我記得，同你去睇日落，
你會係我耳仔邊講嘢，你講得好細聲，
其實我一啲都聽唔清楚架，
不過......我好鍾意聽你咁樣同我講嘢
以後......再無人咁樣同我講嘢喇！
因為你話俾我知......你要走喇！
忽然間......經過咗好多年啦......我再無睇過日落
我記得 你同我去過嘅每一度地方，
果啲地方，通通留係我心裡面，
我唔會講......我老喇，
我只係會講......我係度太耐，時間耐左，
難免知道人總會慢慢咁將過去淡忘，
又會睇住啲嘢，無聲無色咁樣消失！
我先兩日，唔知諗緊乜嘢，
無端端走咗去睇日落......
個日落，就同我記得陪住你睇嗰個樣一樣
不過......就算我點樣裝出若無其事，
我都無辦法唔承認，我失去嘅嘢實在太多啦！
我要走喇！
如果你記得返我係邊個？
我知道，你一定會好唔捨得我，
仲會好掛住我架！再見！