《阿媽的手》A-má ê Tshiú
唐飛Tông Hui
遠遠看著
hn̄g-hn̄g khuànn-tio̍h
頭毛淡薄仔白
thâu-moo tām-po̍h-á pe̍h
彼個就是阮的阿媽
hit ê tsiū-sī gún ê a-má
阮自細漢看伊看到老
gún tsū sè-hàn khuànn i khuànn kàu lāu
生活較苦嘛家己來擔
sing-ua̍h khah khóo mā ka-kī lâi tann
阿媽的手
a-má ê tshiú
共我飼大漢
kā guá tshī tuā-hàn
阿媽疼惜我
a-má thiànn-sioh guá
可比是媽媽
kó-pí sī ma--mah
驚我寒啊驚我熱
kiann guá kuânn--ah kiann guá jua̍h
驚我喙焦
kiann guá tshuì-ta
驚我食袂飽
kiann guá tsia̍h buē pá
驚我有錢走去奅
kiann guá ū-tsînn tsáu khì phānn
交著歹朋友
kau tio̍h pháinn-pîng-iú
驚我做毋著
kiann guá tsuè m̄-tio̍h
嘛毋捌共我罵
mā m̄-bat kā guá mā
厝邊頭尾講我真福氣
tshù-pinn-thâu-bé kóng guá tsin hok-khi
人人呵咾我有一個好阿媽
lâng-lâng o-ló guá ū tsi̍t-ê hó a-má