作詞：林泰佑、江育達
作曲：林泰佑、江育達
天空 海洋 山嶺 河流
田園 老樹 古厝 祖先啊ê智慧
V1
濛濛ê天空 烏烏ê海洋
變形ê山嶺 污濁ê河流
填砂ê田園 鋸掉ê老樹
拆掉ê古厝 破壞無顧慮
是按怎 進步伊恬恬犧牲
祖先智慧文明 漸漸消失 人民茫茫慣勢
為怎樣鹹鹹ê目屎 滴佇破碎 無煞停ê火
燒掉定冊ê古蹟
財團利益手段 (救命啊)
喝卡大聲求政府 也無聽
訴求ê白布條仔 表面接受調查
背後計畫刀仔 現實正咧撩你ê肉
海鳥仔 飛入黑煙沒咧回來
臺中ê空氣欲䆀到啥物境界
台西漸漸生病ê一個一個民眾
不過你啊 選擇留佇故鄉
副歌(阿達)
思啊想啊起～
走找阮祖先啊咱ê記持
思啊想啊起～
囝孫啊咱ê腳步 是欲走去叼位去
思啊想啊起～
找啊找 找攏無 找無轉去ê路佇叼位
V2
地方變化 四界坱埃 這馬囡仔
幌韆鞦攏掛嘴罩 煩惱污染影響一世人
政府隱瞞目睭用手閘起來啊
也對民眾閘起來啊
配合財團關心地皮炒起來啊
啥物市場 立場完全走啊樣
拆掉黑面琵鷺ê家為著開條便路
使人感冒 面對為著反對反對ê人
為著心中想欲完成ê夢 守護水底海翁仔
敢會記得 工廠廢水排放溪水流
樹仔鋸掉 山上ê土摒對庄仔頭
都市開發徵收草地後代找無厝地來傳家
無情ê風吹啊吹啊吹熄公媽廳ê火
為著囝兒序細 為著出生土地
為著祖先留落來ê文化為著臺灣更加美麗
為著影響你去影響伊鬥陣關心做伙證明
對抗不公不義 為著土地正義
副歌(阿達)
思啊想啊起～
走找阮祖先啊咱ê記持
思啊想啊起～
囝孫啊咱ê腳步 是欲走去叼位去喔
思啊想啊起～
有請祖先你著愛來保庇喔
保庇囝孫雙腳徛佇家己溫暖ê家園啊
有家己ê身軀 家己ê思想
家己ê文化佮語言
有家己ê生活 家己ê主張 家己ê尊嚴
家己ê土地 家己ê土地 家己ê土地
還咱一片清氣天空佮空氣
還咱祖先留來文明佮智慧
抗議官官相護財團佮政治
守護一步一腳印ê土地正義