作詞：傳統古詞
作曲：傳統古曲
良緣未遂反禍星，
心裡恨我爹爹不是，
輕貧重富悔親誼，
是汝彩樓高結，汝因何掠只綉球不肯提起，
君寒微，見君恁寒微輕視，
公卿共宰相，不是一寒儒得成器。
古人說，世情冷暖，人面真高低，
君落泊，我君雖然落泊，情願共恁白髮相依。
人說寸絲為定，千金不移，
阮即隨君相絆纏，
路途，途中兼障崎嶇，阮只金蓮步行遲，
全靠，全靠著我君汝今扶阮過只溪墘，
全看著我君汝今助阮過只坑墘。
抄起，抄起阮只綉羅衣，
橋又險，心又虛，
雙手牽君裙，阮今步步慢慢企。
日又落，路又生，
未知許破窯值一乜鄉里，
勸小姐，心莫悲，
咱夫妻行來只處，面前破窯是咱厝裡。
相共行，相共去，伴我即來去度過只今暝，
同我即來去，來去窯中安身己。
到破窯，苦切啼，
窯中障無碗又都無箸，
一路到只，腹又饑，
拔落金針一支，卜度君恁換米，
淡飯輕漿，阮度苦過饑，
且看到後來尾梢是侢呢，
暫看到後來阮到尾是侢呢。