24120/《穿针线的手》Tshīng Tsiam-suànn ê Tshiú
王俊杰Ông Tsùn-kia̍t
十三岁彼一冬
tsa̍p-sann huè hit tsi̍t-tang
伊头一摆攑著针
i thâu tsi̍t-pái gia̍h tio̍h tsiam
认真共线穿予过
jīn-tsin kā suànn tshīng hōo kuè
学做衫并无轻松
o̍h tsò-sann pīng bô khin-sang
日子一工过一工
ji̍t-tsí tsi̍t-kang kuè tsi̍t-kang
做袂了的美丽新衫
tsò buē-liáu ê bí-lē sin-sann
只有替别人咧做
tsí-ū thè pa̍t-lâng teh tsuè
拢无一领是家己的
lóng bô tsi̍t-niá sī ka-kī ê
时间永远拢无等人
sî-kan íng-uán lóng bô tán lâng
一双囡仔手
tsi̍t-siang gín-á tshiú
这马拢皱痕
tsit-má lóng jiâu-hûn
只有予针揬著的时阵
tsí-ū hōo tsiam tu̍h--tio̍h ê sî-tsūn
毋管细汉大汉
m̄-kuán sè-hàn tuā-hàn
疼的滋味心内吞
thiànn ê tsu-bī sim-lāi thun
一双穿针线的手
tsi̍t-siang tshīng tsiam-suànn ê tshiú
付出无需要理由
hù-tshut bô su-iàu lí-iû
一针一线
tsi̍t-tsiam tsi̍t-suànn
穿过阮的生活
tshīng kuè gún ê sing-ua̍h
头毛白
thâu-mn̂g pe̍h
毋知影
m̄ tsai-iánn
但是目睭流目油
tān-sī ba̍k-tsiu lâu ba̍k-iû
线欲过针穿真久
suànn beh kuè tsiam tshīng tsin kú
只有孤单毋敢讲予人听
tsí-ū koo-tuann m̄-kánn kóng hōo-lâng thiann
手攑著香
tshiú gia̍h tio̍h hiunn
请神明保庇啦
tshiánn sîn-bîng pó-pì--lah
手攑著香
tshiú gia̍h tio̍h hiunn
请神明保庇啦
tshiánn sîn-bîng pó-pì--lah