23104/《中山交番》Tiong-san Kau-huan (Kōban)
许富凯Khóo Hù-khái
袂当公然采蜜的蜂
buē-tàng kong-jiân tshái-bi̍t ê phang
三更半暝阁伫花欉
sann-kinn-puànn-mî koh tī hue-tsâng
花欉灯光暗淡
hue-tsâng ting-kng àm-tām
是灵魂内底
sī lîng-hûn lāi-té
无出口的空
bô tshut-kháu ê khang
拍开光映映的花欉
phah-khui kng iànn-iànn ê hue-tsâng
有惊惶包装空虚的采花蜂
ū kiann-hiânn pau-tsong khang-hi ê tshái-hue-phang
证件提出来
tsìng-kiānn the̍h--tshut-lâi
证明你清清气气的一世人
tsìng-bîng lí tshing-tshing-khì-khì ê tsi̍t-sì-lâng
花蕊逐暝用酒精咧淋
hue-luí ta̍k-mê iōng tsiú-tsing teh lâm
淋出胭脂崁袂牢的空缝
lâm tshut ian-tsi khàm buē-tiâu ê khang-phāng
兴到一半的采花蜂
hìng kàu tsi̍t-puànn ê tshái-hue-phang
犹阁困伫
iáu-koh khùn tī
袂赴回魂的青春梦
buē-hù huê-hûn ê tshing-tshun-bāng
山顶的动物拢真可爱
suann-tíng ê tōng-bu̍t lóng tsin khó-ài
为着生存咧相刣
uī-tio̍h sing-tsûn teh sio-thâi
善良的心意绞做伙
siān-liông ê sim-ì ká tsò-hué
绞出险恶的社会
ká tshut hiám-ok ê siā-huē
无人佮意为难啥人
bô-lâng kah-ì uî-lân siánn-lâng
咱拢是孤不而将咧劳动
lán lóng-sī koo-put-jî-tsiong teh lô-tāng
证件提出来
tsìng-kiānn the̍h--tshut-lâi
欲按怎证明
beh án-tsuánn tsìng-bîng
你清清气气的一世人
lí tshing-tshing-khì-khì ê tsi̍t-sì-lâng
花蕊逐暝用芳水咧崁
hue-luí ta̍k-mê iōng phang-tsuí teh khàm
敢是花期已经无希望
kám-sī hue-kî í-king bô hi-bāng
醉生梦死的采花蜂
tsuì-sing bāng-sí ê tshái-hue-phang
蜂岫内底
phang-siū lāi-té
敢犹阁有心爱的人
kám iáu-koh ū sim-ài ê lâng
随人有随人的都合
suî-lâng ū suî-lâng ê too-ha̍p
行到尾路
kiânn kàu bué-lōo
拢是无尾巷
lóng-sī bô-bué-hāng
随人有随人的向望
suî-lâng ū suî-lâng ê ǹg-bāng
望到贴底
bāng kàu tah-té
目箍已经红红红
ba̍k-khoo í-king a̋ng-âng-âng
随人有随人的疼痛
suî-lâng ū suî-lâng ê thiànn-thàng
只䞐悲哀
tsí tshun pi-ai
逐家拢相
ta̍k-ke lóng sio-siōng
证件提出来
tsìng-kiānn the̍h--tshut-lâi
啥人有法度证明
siánn-lâng ū huat-tōo tsìng-bîng
伊清清气气的一世人
i tshing-tshing-khì-khì ê tsi̍t-sì-lâng