唱：尹光 & 邓美玲
作词：潘一帆
作曲：古曲
编曲：周炽楷
旦唱：我错嫁买臣叹倒运
满心苦困 佢两餐不继
自称君子乐贫 唉吔我最怕挨穷
心真不甘 我暗里结识情郎
立心改嫁别人
旦白：吓 个衰佬呀 日头都落岗啦
都仲未曾斩到柴番嚟
一阵间番嚟嘅时候呢
我借头借路迫佢离婚至得 哼
生唱：真系悲失运呀
二竖侵呀 今朝我仲发紧冷
带病入山行 枉我满腹 珠玑
也要挨饥馑呀 怪不得话百无一用
就系书生 我空负饱学多才
竟遭生活困 只因我点金无术
今作采樵人 不幸我家有一个蛮妻
可笑佢难安份呀
只识把金钱就嚟到贪慕
不识所谓淑妇 安...贫
真正系柴米夫妻 无奈事事强为 哑...忍
生白：阿花 阿花 番嚟啦
旦白：咩呀 舍得番嚟啦咩
生白：唏 一见面就闹至得㗎
阿花 我都唔知点解
我今日上山斩柴 好辛苦呀
成个人沾寒沾冻咁
唔该你 走去街尾阿二叔公嗰间药材铺
赊剂廿四味番嚟比我饮下得吗
旦白：咩话 仲话要执药添呀
生白：系囉
旦白：好心你就唔好学人病啦
生白：都话赊住先呀吗
旦白：你该死 我唔赊呀
生白：哎吔阿花 我同你做咗咁耐夫妻
我叫你赊剂茶番嚟比我饮
咁你都话唔得 你 你都唔好咁绝呀你
旦白：哎吔 咁仲话绝呀
系㗎啦 我唔去赊药呀
执药要钱㗎吗
冇钱就唔好学人病啦 衰佬
生白：哎吔 咁嘅说话你都讲得出㗎花 唉
生唱：嗱 你为何待我咁狠心
一旦当路人
旦唱：你寒贫
生唱：唉 赊剂药我饮啫
旦唱：执药要银嘅
生唱：叹贫穷在路边冇人问
苦煞我系穷人
旦唱：病坏灾瘟
生白：咁都蹹得出嘅
旦唱：更令你妻挨穷受困
生唱：艰辛不过暂强忍啫
旦唱：饥馑实恶忍 不再受你呃氹
生白：阿花
生唱：妻莫发呀牢骚
旦白：唔发就假啦
生唱：须知小人穷斯滥
而我则君子安贫
旦白：冇饭食嗰到弊呢
生唱：守得云开
旦白：点呀
生唱：见月明
旦白：嗰阵我都老囉
生唱：终有日否极泰来
劝妻你应宜 守本份
旦白：呸
生唱：贫贱夫妻 百事哀呀
旦白：你知就好啦
生唱：纵使牛衣相对泣
只赢得烦恼 都加深呀
嗱 达人应知命
他日夫贵便妻荣
旦白：唓
生唱：开讲都有话先苦后甜
你都休怨恨好吗
旦白：梗系唔好啦 好心你啦
你啲咁嘅说话我都听到厌啦
旦唱：呢个现实人生
我不能心存幻想 等到你高中
带挈我做夫人
生白：咁你咪等吓囉
旦唱：就算你学姜子牙
生白：迟早得㗎
旦唱：到晚年富贵荣华 可惜我已经
生白：已经咩呀
旦唱：都冇命等
生白：哎吔 你好恶死㗎吗
旦唱：好彩我仲青春
生白：系囉
旦唱：我有莲花美貌
生白：我知
旦唱：结识一位理想 俏郎君
生白：乜话
旦唱：有势有财英俊甚呀
谁叫你粮无隔宿 太清贫
佢可以助你金万両
旦白：有条件㗎啵
生白：咩条件呀
旦唱：惟是要离婚
生白：唔得
旦唱：精嘅你就当堂允肯呀
生白：唔应承
旦白：傻佬 俾钱你离婚噃
要咗佢啦穷鬼
生白：哼 呢啲咁嘅衰钱呀
就算我病死街头 我都系唔要㗎啦
旦白：哦 真唔要定假唔要呀
生白：梗系真唔要啦
旦白：真系唔要我悭番呀
生白：哎吔 花 唔好咁得㗎
生唱：我拒绝钱财难退婚
盼望如花休变心 你系我娇妻
焉能另再婚 你嫁夫纵是穷亦要安份
旦唱：你确实养妻无能
仲弊过一碌棍
生白：哎吔
旦唱：惨过仲要我挨贫
生白：花
生唱：不过暂时累你遭苦困
终有日大富来临
旦唱：请问何时 穷鬼会转运
我冇得闲咁将你等嘅
生唱：妻呀你要想真
旦唱：想去想来都要转退婚
生白：阿花
旦白：一于离婚
生白：唔离 你知唔知呀
女子嫁夫应该要从一而终至好呀
嗱我话比你听呀
你千祈唔好贪慕虚荣比嗰啲万恶金钱
累到你一失足成千古恨噃
旦白：好心你啦 我冇咁得闲听你讲故仔呀
而家呢我系要你写分书
生白：吓
旦白：脱离夫妻关系 大家各行各路
此后男婚女嫁休再问呀
生白：哦 正是夫妻好比同林鸟
大难临头都各自飞
到呢个时候 我唔写都唔得啦
旦白：快啲写啦
生唱：此际我下笔痛苦都已万分
写休书令我断肠甚
小书生抱恨心
杏已出墙 羞不禁
家声破 真不幸
我带病更被刺激深
拆散鸳盟 恨赋仳离
绝爱分书写了令我长怀恨
旦白：喂 写好未呀
生白：写好啦 嗱
旦白：写好拎嚟睇吓啦
生白：睇啦 啱唔啱呀
旦白：咁就差唔多啦
咁真系唔该晒你啦 朱先生
生白：去死啦你
旦唱：哎吔 我本来都好唔舍得你㗎
生唱：哼 我真系多谢你呢个无廉崔氏
你刺激起我以后奋斗去做人呀