作词：佚名
作曲：古曲
(公主今日就系我哋俩个人成亲嘅好日子呀
所谓大登科金榜题名 小登科洞房花烛
春宵一刻值千金 公主你好应该请为夫入房㗎嘛)
(哈 驸马)
(吓)
(你今日嘅驸马爷 系点样得返嚟㗎)
(皇帝封㗎啦)
(哈 若果唔系本公主奏知父王 你想做驸马都怕几难嘞)
(吓)
(如此说来 应该你请本公主入房至啱呀)
(乜嘢话 男人大丈夫七尺昂藏 叫我请你入房真系笑话嘞
你请我入房至啱㗎公主)
(哈 咁言则上你即系唔肯请本公主入房啦)
(几大都唔请 一于唔请)
激气激气令奴难下气 点忿气相请你 点忿气相请你
哼你不请我就唔呀唔入去 对唔住 夜啲啦
夜啲夜啲 风猛就冷到你死
哈哈 我死呀 我死我死就需要你执手尾
等你等你就成世独守香闺里
嗰阵揾人共你冚被嘞
哈 我未必要你
我未必要你 大可以离异
我未必一定要有妻子
你负爱负约不怕死 怕你未敢逆我君圣旨
哼前程尽弃 好应快快离异
你咪当闲事 你太不是 你太不是 你太不重礼仪
哼你 你你 你未识情义
实在无味 实在无味
你应该要常记起 应该要常记起
(记乜嘢呀)
我有话过㗎 我要你受气呀
我为咗爱你 就立乱骗你 等你嫁入我屋企啦
一于我论正家规将你训示
(怕未)
旧约推翻你都要顾住
(好嬲咩)
你即管愤怒 我一于系少理啦
乜得咁易 你应该共我面君再辩词
(好呀)
我同你去面帝皇 判教一死
(你真系敢同我见父皇 我系皇帝女 皇帝都要就我几分呀)
(我够系驸马咯 你当我腐竹呀 去咪去)
(哈你 你你虾我 你唔请我入房
我自己入 你喺外边谂清谂楚啦)
(喂喂喂喂喂公主 咁我呢
你就高床暖枕 净番我喺度挨冻呀
唔系啦 俗语话 两公婆打交 床头打交床尾和
拍门就有房瞓嘞喂)
(公主开门呀)
(边个呀)
(驸马爷呀)
(哦 除非你斟茶认错啦 唔系你就快啲躝尸呀)
唉 真系奇奇奇 娇妻叫我话去躝尸的确系奇
娇妻叫我话去躝尸的确系奇
你系都唔认错就冻到你死啦
咁样搞法确系奇
嗱良辰容易过 良辰容易过噃
你乜咁笨唔愿理 你真冤气
夫妻斗气讲和唔容易
共订白头 时常闹吓 咪当耍花枪根本无问题
若果时时就你 虾我激我一世咁就难下气 我都不想理啦
我哋 我哋夫妻要和气亲蜜 莫过存心激气呀
你个冤家真正系太奀皮
嘻嘻其实系俩公婆激乜鬼气呀
我共你讲得咁多 费事成成日费心机
嚟啦 嚟啦
嚟啦
嘻嘻我哋 我哋俩夫妻
相亲相爱到白眉