作词：谢铭祐
作曲：谢铭祐
一暝一寸阮的查某囝 毋通踢被毋通受风寒
明仔载好天咱著四界行行 穿你彼领新衫
婴仔婴婴惜 莫管日子焉怎摇
你是我的血 我的袂当换的宝 传成咱的大河
貂蝉西施抑是七仙女 伫我心内无人共你比
你的撒奶抑是你的受气 拢是我的安慰
父母亲像天 生成致荫囝儿
你著困予甜 好梦若是被惊醒 免惊! 阿爸伫遮
一工一工花蕊慢慢大 花若欲开扭嘛扭袂行
毋管当时会换啥物人疼 你是我的心肝仔囝
望你好名声 日后有人探听
望你无病痛 揣着你幸福的伴 予我安心来行
------------------------------------------
《查某囝》Tsa-bóo-kiánn
谢铭祐Siā Bîng-iū
一暝一寸阮的查某囝
tsi̍t-mî tsi̍t-tshùn gún ê tsa-bóo-kiánn
毋通踢被毋通受风寒
m̄-thang that-phuē m̄-thang siū hong-kuânn
明仔载好天咱著四界行行
mâ-á-tsài hó-thinn lán tio̍h sì-kè kiânn-kiânn
穿你彼领新衫
tshīng lí hit niá sin-sann
婴仔婴婴惜
inn-á inn-inn sioh
莫管日子按怎摇
mài kuán ji̍t-tsí án-tsuánn iô
你是我的血
lí sī guá ê hueh
我的袂当换的宝
guá ê buē-tàng uānn ê pó
传承咱的大河
thuân-sîng lán ê tuā-hô
貂蝉西施抑是七仙女
Tiau-siâm Se-si ia̍h-sī Tshit-sian-lí
伫我心内无人佮你比
tī guá sim-lāi bô-lâng kah lí pí
你的司奶抑是你的受气
lí ê sai-nai ia̍h-sī lí ê siūnn-khì
拢是我的安慰
lóng-sī guá ê an-uì
爸母亲像天
pē-bú tshin-tshiūnn thinn
生成致荫囝儿
senn-sîng tì-ìm kiánn-jî
你著困予甜
lí tio̍h khùn hōo tinn
好梦若是被惊醒
hó-bāng nā-sī pī kiann tshínn
免惊
bián-kiann
阿爸伫遮
a-pah tī tsia
一工一工花蕊慢慢大
tsi̍t-kang tsi̍t-kang hue-luí bān-bān tuā
花若欲开
hue nā beh khui
搝嘛搝袂行
giú mā giú buē kiânn
毋管当时会换啥物人疼
m̄-kuán tang-sî ē uānn siánn-mih lâng thiànn
你是我的心肝仔囝
lí sī guá ê sim-kuann-á-kiánn
望你好名声
bāng lí hó miâ-siann
日后有人探听
ji̍t-āu ū-lâng thàm-thiann
望你无病疼
bāng lí bô pēnn-thiànn
揣着你幸福的伴
tshuē-tio̍h lí hīng-hok ê phuānn
予我安心来行
hōo guá an-sim lâi kiânn
望你无病疼
bāng lí bô pēnn-thiànn
揣着你幸福的伴
tshuē-tio̍h lí hīng-hok ê phuānn
予我安心来行
hōo guá an-sim lâi kiânn