作词：林泰佑、江育达
作曲：林泰佑、江育达
天空 海洋 山岭 河流
田园 老树 古厝 祖先啊ê智慧
V1
濛濛ê天空 乌乌ê海洋
变形ê山岭 污浊ê河流
填砂ê田园 锯掉ê老树
拆掉ê古厝 破坏无顾虑
是按怎 进步伊恬恬牺牲
祖先智慧文明 渐渐消失 人民茫茫惯势
为怎样咸咸ê目屎 滴伫破碎 无煞停ê火
烧掉定册ê古蹟
财团利益手段 (救命啊)
喝卡大声求政府 也无听
诉求ê白布条仔 表面接受调查
背后计画刀仔 现实正咧撩你ê肉
海鸟仔 飞入黑烟没咧回来
台中ê空气欲䆀到啥物境界
台西渐渐生病ê一个一个民众
不过你啊 选择留伫故乡
副歌(阿达)
思啊想啊起～
走找阮祖先啊咱ê记持
思啊想啊起～
囝孙啊咱ê脚步 是欲走去叼位去
思啊想啊起～
找啊找 找拢无 找无转去ê路伫叼位
V2
地方变化 四界坱埃 这马囡仔
幌千秋拢挂嘴罩 烦恼污染影响一世人
政府隐瞒目睭用手闸起来啊
也对民众闸起来啊
配合财团关心地皮炒起来啊
啥物市场 立场完全走啊样
拆掉黑面琵鹭ê家为著开条便路
使人感冒 面对为著反对反对ê人
为着心中想欲完成ê梦 守护水底海翁仔
敢会记得 工厂废水排放溪水流
树仔锯掉 山上ê土摒对庄仔头
都市开发征收草地后代找无厝地来传家
无情ê风吹啊吹啊吹熄公妈厅ê火
为著囝儿序细 为著出生土地
为著祖先留落来ê文化为著台湾更加美丽
为著影响你去影响伊斗阵关心做伙证明
对抗不公不义 为著土地正义
副歌(阿达)
思啊想啊起～
走找阮祖先啊咱ê记持
思啊想啊起～
囝孙啊咱ê脚步 是欲走去叼位去喔
思啊想啊起～
有请祖先你著爱来保庇喔
保庇囝孙双脚徛伫家己温暖ê家园啊
有家己ê身躯 家己ê思想
家己ê文化佮语言
有家己ê生活 家己ê主张 家己ê尊严
家己ê土地 家己ê土地 家己ê土地
还咱一片清气天空佮空气
还咱祖先留来文明佮智慧
抗议官官相护财团佮政治
守护一步一脚印ê土地正义