作词：蔡义德
作曲：蔡义德
编曲：蚂蚁
日头要落山 海面边红啪啪
白云驾彩霞 每天换新衫
鸟仔飞高高 不惊交通的开红单
路灯气扯扯 啊要照路 啊要罚伫
日头堵落山 四面八方黑抹抹
风雨尚好胆 下暗搁请假
月娘困无饱 澎粉胭脂一直抹
天星尚认命 啊那排队 啊那点名
巷仔口一摊姜母鸭 归暗人拢插插插
要食通血怯风寒 阮从做囡仔著食甲大
下暗要来去乎人情 有人出钱升食免惊
补阴补阳兼补肝 固元固本固本身
有食搁有抓 锅底包返来做宵夜
一半乎阿爸 一半饲阿娘
吃著姜母鸭 冬天免盖被嘛会流汗
若要问感觉 实在温暖 实在真正好吃
------------------------------------------
《姜母鸭》Kiunn-bó-ah
蔡义德Tshuà Gī-tik
日头欲落山
ji̍t-thâu beh lo̍h-suann
海面天边红冇冇
hái-bīn thinn-pinn âng phànn-phànn
白云骂彩霞
pe̍h-hûn mā tshái-hâ
逐工换新衫
ta̍k-kang uānn sin-sann
鸟仔撇悬悬
tsiáu-á phiat kuân-kuân
毋惊交通的开红单
m̄-kiann kau-thong--ê khui âng-tuann
路灯气掣掣
lōo-ting khì tshuah-tshuah
也欲照路
iā beh tsiò-lōo
也欲罚徛
iā beh hua̍t-khiā
日头拄落山
ji̍t-thâu tú lo̍h-suann
四面八方乌嘛嘛
sì-bīn pat-hong oo mà-mà
风雨上好胆
hong-hōo siōng hó-tánn
下暗阁请假
e-àm koh tshíng-ká
月娘困无饱
gue̍h-niû khùn bô pá
膨粉胭脂一直抹
phòng-hún ian-tsi it-ti̍t buah
天星上认命
thinn-tshinn siōng jīn-miā
也那排队
iā ná pâi-tuī
也那点名
iā ná tiám-miâ
巷仔口一担姜母鸭
hāng-á-kháu tsi̍t-tànn kiunn-bú-ah
规暗人拢插插插
kui àm lâng lóng tshah-tshah-tshah
欲食通血去风寒
beh tsia̍h thong-hiat khì-hong-kuânn
阮对做囡仔就食甲大
gún tuì tsuè-gín-á tō tsia̍h kah tuā
下暗欲来去予人请
e-àm beh lâi-khì hōo-lâng tshiánn
有人出钱就食免惊
ū-lâng tshut tsînn tiō tsia̍h bián-kiann
补阴补阳兼补肝
póo-im póo-iông kiam póo-kuann
固元固本固身命
kòo-guân kòo-pún kòo sin-miā
有食阁有掠
ū tsia̍h koh ū lia̍h
鼎底包转来做宵夜
tiánn-té pau tńg-lâi tsuè siau-iā
一半予阿爸
tsi̍t-puànn hōo a-pah
一半饲阿娘
tsi̍t-puànn tshī a-niâ
食著姜母鸭
tsia̍h tio̍h kiunn-bú-ah
冬天免盖被嘛会流汗
tang-thinn bián kah-phuē mā ē lâu-kuānn
若欲问感觉
nā beh mn̄g kám-kak
实在温暖
si̍t-tsāi un-luán
实在真正好食
si̍t-tsāi tsin-tsiànn hó-tsia̍h